എറണാകുളം : കാർഷികമേഖല പുതിയ തലമുറയുടെ കയ്യിൽ ഭദ്രമെന്നു കൃഷി മന്ത്രി പി പ്രസാദ് . പറവൂർ ബ്ലോക്ക് പഞ്ചായത്തിന്റെ മേൽനോട്ടത്തിൽ കൂനമ്മാവ് സെന്റ്. ജോസഫ് ബോയ്സ് ഹോമിലെ വിദ്യാത്ഥികളുടെ കൃഷിയിടമായ കൈതാരം പൊക്കാളി പാടശേഖരത്തിൽ വിത്തിറക്കൽ ഉദ്ഘാടനം ചെയ്തു സംസാരിക്കുകയായിരുന്നു മന്ത്രി . പറവൂർ ബ്ലോക്ക് പഞ്ചായത്തിന്റെ തിരുവാതിര ഞാറ്റുവേല – വിത്തെഴുത്ത്‌ പറ നിറച്ച് മന്ത്രി ഉദ്ഘാടനം ചെയ്തു. നാളെയുടെ വാഗ്ദാനങ്ങളായ കുഞ്ഞുങ്ങൾ നമ്മളെ നയിക്കണം. കൃഷിയോടുള്ള അവരുടെ ഗൗരവവും താൽപര്യവും നാം മാതൃകയാക്കണമെന്നും മന്ത്രി പറഞ്ഞു. കൈതാരം പാടശേഖരത്തിൽ കൃഷി ഇറക്കുന്ന സെന്റ് . ജോസഫ് ബോയ്സ് ഹോമിലെ വിദ്യാർത്ഥികളെ മന്ത്രി അഭിനന്ദിച്ചു .ജീവിക്കുന്നതിനു ഊർജ്ജം ഭക്ഷണത്തിൽ നിന്നാണ് നമുക്ക് ലഭിക്കുന്നത്. അതിനാൽ തന്നെ ജീവിതത്തിന്റെ അടിസ്ഥാനമാണ് കൃഷി . ഭക്ഷണം കഴിക്കാൻ അർഹതയുള്ളവർ കൃഷിയുമായി ബന്ധമുള്ളവർ ആകണം . ദിവസവും അരമണിക്കൂറെങ്കിലും കൃഷിക്കായി നീക്കിവെച്ചാൽ വിഷരഹിതമായ ഭക്ഷണം നമ്മുക്ക് കഴിക്കുവാൻ സാധിക്കും. കോവിഡ് കാലം നമ്മെ ബോധ്യപ്പെടുത്തിയത് ആരോഗ്യത്തെക്കാൾ വലിയ ധനം ഇല്ലാ എന്നാണ് . കാർഷികരംഗത്തെ പ്രശ്നങ്ങളും പൊക്കാളി കർഷകരുടെ പ്രശ്നങ്ങളും പരിഹരിക്കാൻ വേണ്ട എല്ലാ പിന്തുണയും നൽകാൻ കൃഷി വകുപ്പ് പ്രതിജ്ഞാബദ്ധമാണെന്നും മന്ത്രി പറഞ്ഞു . ടൗട്ടെ ചുഴലിക്കാറ്റിന് മുൻപുവരെയുള്ള എല്ലാ ഫണ്ടുകളും കൃഷിവകുപ്പ് അനുവദിച്ചിട്ടുണ്ട് . കേരളത്തിലെ സഹകരണ മേഖലയുമായി സഹകരിച്ചു വൈവിധ്യമാർന്ന ഓരോ കാർഷിക ഉത്പന്നത്തെയും മൂല്യവർധിത ഉല്പന്നമാക്കി മാറ്റുന്ന പദ്ധതി ഇതിനോടകം ആരംഭിച്ചു എന്നും മന്ത്രി പറഞ്ഞു. നൂറു ദിന പദ്ധതിയിലുൾപ്പെടുത്തി 150 ഫാർമേഴ്സ് പ്രൊഡ്യൂസേഴ്സ് സംഘങ്ങളാണ് രൂപീകരിക്കുന്നത് . കൃഷിക്കാരനെ സംരക്ഷിക്കാനുള്ള എല്ലാ നടപടികളും സർക്കാർ സ്വീകരിക്കുമെന്നും കൃഷിക്കാരന് കൃഷിയിലൂടെ തന്നെ അന്തസ്സാർന്ന ജീവിതം നയിക്കാൻ വേണ്ട നടപടികളും സ്വീകരിക്കുമെന്ന് മന്ത്രി പറഞ്ഞു .